Լեհաստանի նախագահը դարձել է ռուս պրանկերների զոհը

20:57   15 Հուլիս 2020    392

Լեհաստանի վերընտրված նախագահ Անջեյ Դուդան ռուս պրանկերների զոհ է դարձել, որոնք ընտրությունների երկրորդ փուլից հետո զանգահարել են Լեհաստանի պետության ղեկավարին՝ ներկայանալով որպես ՄԱԿ-ի գլխավոր քարտուղար:

Այս մասին չորեքշաբթի օրը հայտնել է լեհական RMF ռադիոկայանը, որը ստացել է այդ խոսակցության իսկության հաստատումը նախագահի նստավայրում։

Ինչպես տեղեկացրել է ռադիոկայանը, կատակի հետևում կանգնած են ռուս պրանկերներ Վլադիմիր Կուզնեցովը (Վովան) և Ալեքսեյ Ստոլյարովը (Լեքսուս):

Նրանք զանգահարել են Լեհաստանի առաջնորդին երկուշաբթի և ներկայացել են որպես ՄԱԿ-ի գլխավոր քարտուղար՝ շնորհավորելով Դուդային ընտրություններում տարած հաղթանակի կապակցությամբ: Լեհական գաղտնի ծառայությունները պարզում են այս հեռախոսազանգի հանգամանքները:

Զրույցի ընթացքում պրանկերները Դուդայից հետաքրքրվել են երկրում համաճարակաբանական իրավիճակի և կորոնավիրուսի հնարավոր աղբյուրների մասին: Լեհաստանի առաջնորդը հայտնել է, որ «գուցե, աղբյուրն Ուկրաինան է»:

«Որովհետև մեզ մոտ Ուկրաինայից շատ մարդ կա», - ասել է նա՝ ընդգծելով, որ վարակման դեպքերը քիչ են և «իրավիճակը վերահսկվում է»:

Պրանկերները հարցրել են Դուդային վերջին տարիներին Լեհաստանում զանգվածաբար ապամոնտաժվող Կարմիր բանակի հուշարձանների հետ կապված իրավիճակի մասին:

Լեհաստանի նախագահը հավաստիացրել է, որ Վարշավան «չի պատերազմում հուշարձանների դեմ»:

«Մենք ունեցել ենք մի քանի դեպք, բայց միայն մի քանիսը: Սա մեծ խնդիր չէ», - ավելացրել է նա։

Հարցին՝ Լեհաստանը նախատեսո՞ւմ է վերադարձնել Ուկրաինայի տարածքի մի մասը՝ Լվովը, Դուդան հավաստիացրել է, որ այդ թեման «Լեհաստանում քաղաքական քննարկման առարկա չէ»:

«Մենք դա չենք քննարկում: Ոչ մի քաղաքական ուժ այդ մասին չի խոսում», - ասել է Լեհաստանի առաջնորդը:

Լեհաստանում նախագահի ընտրություններն ավարտվել են հուլիսի 12-ին:

Hayatsk.info

Հեշթեգներ: Լեհաստան  


Վերնագիրի այլ պիտակները