Գիտնականները ջրի նոր վիճակ են բացահայտել

19:16   18 Սեպտեմբեր 2020    225

Ամերիկացի հետազոտողներն առաջին անգամ ջրի չափումներ են իրականացրել ջրի սառեցման սովորական կետից փոքր-ինչ ցածր ջերմաստիճանային պայմաններում, որոնց արդյունքում եկել են եզրակացության, որ գերսառեցված ջուրն իրենից ներկայացնում է երկու հեղուկ՝ մեկում:

Ինչպես ներկայացնում է РИА Новости-ն՝ վկայակոչելով Science ամսագրում հրապարակված հետազոտության արդյունքները, ջուրը՝ որպես քիմիական նյութ, մինչ օրս մինչև վերջ ուսումնասիրված չէ: Գիտնականներն այն հաճախ անվանում են ամենաառեղծվածային նյութը Երկրի վրա:

Բանն այն է, որ ջուրը նման չէ մյուս հեղուկներին. սառչելիս այն ընդլայնվում է, ոչ թե սեղմվում, ինչպես մյուս բոլորը, ջրի խտությունը միևնույն ժամանակ նվազում է: Այդ իսկ պատճառով ջրային սառույցը չի սուզվում, այլ լողում է մակերեսին: Ջրի եռման ջերմաստիճանը բարձր է, և այն լավ լուծիչ է, այսինքն տարբեր պայմաններում ջրում մեծ թվով օրգանական և ոչ օրգանական նյութեր են լուծվում, տեղեկացնում է Hayatsk.info-ն:

Բացի այդ, ջուրը ևս մեկ հետաքրքիր հատկություն ունի. այն միանգամից չի սառչում: Եթե այլ հեղուկներ սառեցման կետն անցնելուն պես սկսում են աստիճանաբար անցնել պինդ վիճակի, ջուրը «դիմադրում է» մինչև վերջ: Եվ պինդ վիճակի վերափոխվելու համար ջրին միշտ պետք են հանքային և օրգանական ծագման մասնիկներ՝ բյուրեղացման միջուկներ:

ԱՄՆ էներգետիկայի նախարարությանը կից Խաղաղօվկիանոսյան հյուսիսարևմտյան ազգային լաբորատորիայի մասնագետները որոշել են ստուգել, թե մինչև որ ջերմաստիճանը ջուրը կպահպանի հեղուկ վիճակը, եթե նման մասնիկներ չլինեն:

Նրանք լազերի օգնությամբ կոտրել են սառցե շերտը՝ գերսառեցված հեղուկ ջուր ստեղծելով, այնուհետև ինֆրակարմիր սպեկտրոսկոպիայի օգնությամբ հետևել են ջրի վերափոխման բոլոր փուլերին 135- 245 կելվին ջերմաստիճանում (-138-ից մինչև -28 աստիճան՝ ըստ Ցելսիուսի):

Գիտնականները նկատել են, որ գերսառեցման ժամանակ ջուրը համակենտրոնանում է խիտ հեղուկ վիճակում, որը շարունակում է համագոյակցել սովորական հեղուկ վիճակի հետ:

«Մենք ցույց տվեցինք, որ հեղուկ ջուրը շատ ցածր ջերմաստիճաններում ոչ միայն հարաբերականորեն կայուն է, այլև գոյություն ունի երկու կառուցվածքային ձևերում: Ստացված տվյալները թույլ են տալիս լուծել վաղեմի վեճն այն հարցում, թե միշտ է արդյոք խոր գերսառեցված ջուրը բյուրեղանում նախքան հավասարակշռության գալը: Պատասխանն է՝ ոչ»,- ասվում է հետազոտության հեղինակներից մեկի՝ Գրեգ Քիմմելի հայտարարության մեջ:

Գիտնականներն առաջին անգամ փորձով ապացուցել են, որ գերսառեցված ջուրը կարող է գտնվել կայուն երկփուլ հեղուկ վիճակում, իսկ փուլերի վիճակը տարբերվում է՝ կախված ջերմաստիճանից:

Hayatsk.info

Հեշթեգներ: Գիտնականներ  


Վերնագիրի այլ պիտակները