Բայդենը հայտարարել է, որ պատրաստ է պատվաստվել կորոնավիրուսի դեմ. CNN

18:43   04 Դեկտեմբեր 2020    211

ԱՄՆ ընտրված նախագահ Ջո Բայդենը CNN-ին տված հարցազրույցում հայտարարել է, որ պատրաստ է հրապարակային կերպով պատվաստվել կորոնավիրուսի դեմ:

Բայդենն ասել է, որ ուրախ կլինի անել դա` պատասխանելով լրագրողի այն հարցին, թե արդյոք պատրաստ է մինչև հունվարի 20-ին նախատեսված երդմնակալության արարողությունն ընդունել պատվաստանյութը:

Ասել է նաև, որ կպատվաստվի, եթե ԱՄՆ ալերգիկ և ինֆեկցիոն հիվանդությունների ազգային ինստիտուտի տնօրեն Էնթոնի Ֆաուչին հաստատի, որ նոր պատվաստանյութն անվտանգ է, տեղեկացնում է Hayatsk.info-ն:

Բայդենը մտահոգություն է հայտնել, որ ԱՄՆ-ում մարդիկ կորցնում են հավատը պատվաստանյութի արդյունավետության հարցում և շեշտել, որ կարևոր է ամերիկացիներին հավաստիացնել պատվաստանյութի անվտանգ լինելը:

ԱՄՆ նախագահական ընտրություններում Բայդենը ստացել է ընտրիչների ձայների մեծամասնությունը, ինչն էլ պահանջվում է նախագահի պաշտոնում ընտրվելու համար: Գործող նախագահ Դոնալդ Թրամփը, սակայն, պնդում է, որ ինքն է հաղթել, և տարբեր նահանգներում վիճարկում է արդյունքները:

Միաժամանակ, սակայն, Թրամփն իր վարչակազմին հրահանգել է իրականացնել լիազորությունները հաջորդ վարչակազմին փոխանցելու սկզբնական գործընթացները:

ԱՄՆ նոր նախագահի երդմնակալության արարողությունը պետք է կայանա գալիք տարվա հունվարի 20-ին:

Hayatsk.info

Հեշթեգներ: Բայդեն  


Վերնագիրի այլ պիտակները

hayatsk.info ©2016 | Բոլոր իրավունքները պաշտպանված են