Հնդկաստանում հիվանդանոցի աշխատակիցը մահացել է կորոնավիրուսի դեմ պատվաստվելուց 24 ժամ անց

12:09   18 Հունվար 2021    200

Հնդկաստանի Ուտար Պրադեշ նահանգի Մորադաբադ քաղաքի հիվանդանոցի աշխատակիցը կորոնավիրուսի դեմ պատվաստանյութի ներարկումից 24 ժամ անց մահացել է։

Ինչպես այսօր լրագրողներին հայտնել է հիվանդանոցի գլխավոր բժիշկը, ըստ նախնական ենթադրության՝ մահվան պատճառը, հավանաբար, պատվաստումը չի եղել, տեղեկացնում է Hayatsk.info-ն։

Բժշկի խոսքով՝ աշխատակիցը պատվաստվել է շաբաթ կեսօրին և կիրակի գանգատվել է շնչառության հետ կապված դժվարություններից։

«Մենք պարզում ենք նրա մահվան պատճառները, դիահերձում է իրականացվելու։ Նրա մահը նման չէ պատվաստումներից հետո ի հայտ եկող արձագանքին: Պատվաստումից հետո նա շաբաթ գիշերը հերթապահել է, և խնդիրներ չի ունեցել»,- ասել է նա։

Մահացած աշխատակցի հարազատները հաստատել են, որ նա իրեն վատ է զգացել նախքան պատվաստումը։ Մահվան պաշտոնական պատճառը «սիրտ-թոքային հիվանդության հետևանքով առաջացած սրտածին շոկն է»:

Հունվարի 16-ին Հնդկաստանում մեկնարկել է կորոնավիրուսի դեմ համընդհանուր պատվաստումը, որը տեղական իշխանությունները բնութագրել են «աշխարհում ամենամասշտաբայինը»:

Հնդկաստանը նախատեսում է մինչև այս տարվա հուլիսը մոտ 300 մլն մարդւ պատվաստել:

Hayatsk.info

Հեշթեգներ: Հնդկաստան  


Վերնագիրի այլ պիտակները