Փորթլենդի քաղաքապետը պղպեղային ցողացիր է կիրառել իր հետ վիճաբանության մեջ մտած տղամարդու դեմ

14:04   26 Հունվար 2021    203

Ամերիկյան Փորթլենդի քաղաքապետ Թեդ Ուիլերն, անվտանգության նկատառումներից ելնելով, պղպեղային ցողացիր է կիրառել սրճարանում առանց դիմակի իրեն մոտեցած և վիճաբանություն հրահրած տղամարդու դեմ, հաղորդում է տեղական The Oregonian պարբերականը՝ վկայակոչելով ոստիկանության փաստաթուղթը:

Միջադեպը տեղի է ունեցել կիրակի երեկոյան՝ տեղական ժամանակով մոտ 20։00-ին։ Ուիլերը ոստիկանությանը հայտնել է, որ ինքը նախկին քաղաքապետ Սեմ Ադամսի հետ փաբում ընթրիքը վերջացնելիս է եղել, երբ նրանց է մոտեցել միջին տարիքի մի տղամարդ:

Տղամարդը քաղաքապետին մեղադրել է հաստատության տարածքում դիմակ չկրելու համար։ Ուիլերն ի պատասխան նշել է, որ նրանք ընթրել են բոլորից հեռու՝ մեկուսի վայրում, որտեղ դիմակ չի պահանջվում։ Տղամարդը, որն անձամբ դիմակ չի կրել, քաղաքապետին հետևել է մինչև մեքենան, և Ուիլերի խոսքով, իրենից կանգնել է մոտ մեկ մետր հեռավորության վրա և ամբողջ ընթացքում տեսանկարել է նրան։ Քաղաքապետը խոստովանել է, որ սկսել է վախենալ իր անվտանգության համար:

«Ես նրան հստակ ասացի, որ ինձնից հեռու կանգնի։ Նա չլսեց, ես էլ չգուշացրի, որ պղպեղային ցողացիր ունեմ ու հետ չկանգնելու դեպքում կկիրառեմ»,- ոստիկանությանը պատմել է քաղաքապետը՝ նշելով, որ իր պահանջին չենթարկվելուց հետո նա պղպեղային ցողացիրը փչել է տղամարդու աչքերի մեջ։

Դրանից հետո Ուիլերը տղամարդուն մի շիշ ջուր է տվել, որպեսզի նա լվա աչքերը։ Քաղաքապետի ներկայացուցիչ Թիմ Բեքերի խոսքով՝ Ուիլերը «հետաքննության շրջանակում համագործակցում է ոստիկանության հետ»։

Hayatsk.info

Հեշթեգներ: Փորթլենդ  


Վերնագիրի այլ պիտակները