Սաուդյան Արաբիան հերքել է Հորդանանում ենթադրյալ ապստամբության հետ կապ ունենալու վարկածը

11:57   07 Ապրիլ 2021    157

Սաուդյան Արաբիայի պաշտոնյաները հերքել են Հորդանանի Թագավորությունում ենթադրյալ ապստամբության հետ կապ ունենալը։

Հորդանանի նախկին թագաժառանգը տնային կալանքի տակ էր հայտնվել այն բանից հետո, երբ մասնակցել էր ցեղային հանդիպումներին, որտեղ բացահայտ քննադատվել էր նրա եղբայրը` Հորդանանի միապետ Աբդուլլահ 2-րդը։

Հիշեցնենք՝ Հորդանանի փոխվարչապետ Այման Սաֆադն ասել էր, որ արքայազնն օտարերկրյա ուժերի հետ երկիրն ապակայունացնելուն ուղղված «չարամիտ դավադրության» մաս է կազմում։

BBC-ի հաղորդմամբ, Սաուդյան Արաբիայի արտաքին գործերի նախարար, արքայազն Ֆեյսալ բն Ֆարհանը պատվիրակության հետ մեկնել էր Հորդանանի մայրաքաղաք Ամման՝ «Հորդանանի թագավոր Աբդուլլահ 2-րդին և կառավարությանը լիակատար համերաշխություն հայտնելու»։ Ըստ նրանց, սա Սաուդյան Արաբիայի միակ և միասնական կարծիքն է և ցանկացած ենթադրություն այն մասին, որ Սաուդյան Արաբիան ներգրավված է իր հարևանի ապակայունացման փորձերին՝ «անհեթեթություն» է։

Կիրակի հորդանանցի պաշտոնյաները հայտնել էին, որ միառժամանակ հետևում են արքայազն Համզայի գործողություններին։ Նրանք հայտնել էին, որ դավադրություն է կազմակերպվում Հաշեմյան ընտանիքի նկատմամբ և նշել, որ դա երկու աղբյուր ունի՝ արքայազն Համզան և պաշտոնյաներ, որոնք կապեր ունեն մեկ այլ պետության հետ։

Ֆինանսների նախկին նախարար Բասեմ Իբրահիմ Աուադալլահը, որը միջադեպի հետևանքով ձերբակալվածների թվում է, հզոր արտաքին կապեր ունի՝ այդ թվում Սաուդյան Արաբիայի թագաժառանգի և ԱՄԷ փաստացի կառավարիչ, թագաժառանգ Մուհամեդ բն Զայեդի հետ։

BBC-ին նշել է, որ Սաուդյան Արաբիան և Հորդանանը պատմականորեն կապված են միմյանց և անհասկանալի է՝ Հորդանանն ապակայունացնելու փորձերին Սաուդյան Արաբիայի մասնակցությունը։

Ինչպես ավելի վաղ տեղեկացրել էր Tert.am-ը, Հորդանանի նախկին թագաժառանգ արքայազն Համզան տնային կալանքի տակ է՝ թագավորությունում «անվտանգության և կայունության» դեմ ուղղված գործողությունների մեղադրանքով։ Հորդանանի փոխվարչապետ Այման Սաֆադն ասել է, որ արքայազնն օտարերկրյա ուժերի հետ երկիրն ապակայունացնելուն ուղղված «չարամիտ դավադրության» մաս է կազմում։

Հորդանանի զինված ուժերի գլխավոր շտաբի փոխանցմամբ` դավադրության գործով ձերբակալվել է 14-ից 16 մարդ՝ այդ թվում ֆինանսների նախկին նախարար Բասեմ Իբրահիմ Աուադալլահն ու թագավորական ընտանիքի անդամ Շարիֆ Հասան բեն Զաեդը: Միևնույն ժամանակ, բանակի հրամանատարությունը հերքել է նախկին թագաժառանգ արքայազն Համզայի ձերբակալման մասին տեղեկությունը:

Համզան, որին Աբդուլլահ 2-րդը զրկել է թագաժառանգի տիտղոսից 2004 թվականին, մեղադրել է Հորդանանի ղեկավարությանը կոռուպցիայի, նեպոտիզմի և ավտորիտար կառավարման համար: Շաբաթ օրը BBC-ին ուղղարկած տեսանյութ արքայազնն ասել էր․ «Ոչ ոք ի վիճակի չէ որևէ բանի մասին խոսել կամ կարծիք հայտնել՝ առանց բռնության, ձերբակալման, հետապնդումների և սպառնալիքների ենթարկվելու»։

Այս միջադեպից հետո արքայազն Համզան արժանացել է զգալի թվով հորդանանցիների համակրանքին, որոնք կարծում են, որ այժմ արքայազնին վարկաբեկելու արշավ է սկսվել։

Երեկ նախկին թագաժառանգ Համզան ստորագրել է նամակ, որով խոստացել է հավատարիմ մնալ իշխող Հաշեմյան միապետական ընտանիքի ավանդույթներին և մոտեցումներին։ Նամակը հաջորդել է թագավոր Աբդուլլահ 2-րդի կողմից՝ ընտանիքում առկա տարաձայնությունները վերացնելու վերաբերյալ միջնորդությանը համաձայնություն տալուն, ինչպես նաև արքայազն Հասանի և թագավորական ընտանիքի այլ բարձրաստիճան անդամների հետ հանդիպմանը։

Համզան Հորդանանի ներկայիս Աբդուլլահ Առաջին թագավորի կրտսեր խորթ եղբայրն է և նախկին թագավոր Ալ Հուսսեյն Առաջինի և նրա 4-րդ կնոջ՝ Նուր թագուհու առաջնեկը։ 2004 թվականին, գահ բարձրանալուց 5 տարի անց, Աբդուլլահ թագավորը արքայազն Համզային զրկել է «թագաժառանգ» տիտղոսից՝ նշելով, որ այն համադրելի չէ իր ստանձնելիք պաշտոնների հետ։ Երկուսի միջև հարաբերություններում ոչ մի բացահայտ մրցակցություն առ այսօր չի եղել։

Հիշեցնենք, որ սա Թագավորությունում հազվագյուտ միջադեպ է։ Հորդանանը Մերձավոր Արևելքում ԱՄՆ-ի դաշնակիցն է և տարիներ ի վեր ամենակայուն պետությունը։

Hayatsk.info

Հեշթեգներ: Սաուդյան-Արաբիա  


Վերնագիրի այլ պիտակները