Ս. Արաբիան շնորհակալություն է հայտնել ԱՄՆ-ին իրանական նավթին վերաբերող որոշման համար

16:00   23 Ապրիլ 2019    209

Սաուդյան Արաբիայի արտաքին գործերի նախարար Իբրահիմ ալ Ասաֆը հայտարարել է, որ թագավորությունը երախտագիտություն է հայտնում իրանական նավթի գնման պատժամիջոցներից բացառությունների վերացման վերաբերյալ ԱՄՆ-ի որոշման առնչությամբ:

Ապրիլի 22-ին ԱՄՆ-ի նախագահ Դոնալդ Թրամփի վարչակազմը հայտարարել է, որ չի երկարաձգի այդ բացառությունները: Սպիտակ տունն այդ կերպ հույս ունի իրանական նավթի արատահանումը կրճատել մինչեւ զրո:

«Թագավորությունը լիովին պաշտպանում է ԱՄՆ-ի ձեռնարկած քայլերը՝ դրանք համարելով անհրաժեշտ՝ իրանական վարչակարգին հարկադրելու դադարեցնել ապակայունացման քաղաքականությունը, ահաբեկչության օժանդակումն ու հովանավորումն ամբողջ աշխարհում»,- հայտարարել է արտաքին գործերի նախարարության ղեկավարը, ում խոսքը մեջբերում է Սաուդյան Արաբիայի SPA նորությունների գործակալությունը:

Նախարարը նշել Է, որ թագավորությունը կշարունակի շուկաների կայունացմանը միտված իր քաղաքականությունը: «Թագավորությունն իր գործողությունները կհամակարգի նավթի մյուս արտադրողների հետ՝ սպառողներին նավթի համապատասխան մատակարարումների ապահովման նպատակով, ինչպես նաև համաշխարհային տնտեսության կայունության և աճի ապահովման համար»,- հավելել է Ալ Ասաֆը:

Hayatsk.info

Հեշթեգներ: Սաուդյան-Արաբիա   ԱՄՆ  


Վերնագիրի այլ պիտակները